ED-in Farooq Abdullah thu zawtfiah

Enforcement Directorate chuan nimin khan Jammu and Kashmir chief minister hlui leh National Con­fe­rence hotu Farooq Abdullah chu Jammu and Kashmir Cricket Asso­ciation sum tihchingpen kaih­hnawihah thu an zawtfiah. 

National Conference chuan an party hotu thu zawhfiah a ni chu Abdullah-a'n J&K-in special status an neih let theihna tura eptu party hrang hrangte a huikhawm avanga centre-a BJP sorkarin phuba lak a tumna nia an ngaih thu an sawi. 

Hetih lai hian ED chuan kum 2002-2011 inkara J&K Cricket Association sum, cheng vaibelchhe 44.69 tihchinpen chungchanga kum 2018-a CBI in Abdullah leh midang pathum lakah chargesheet a siam kaihhnawihah thu an zawtfiah niin a sawi thung. 

Mahse NC chuan Abdullah hmalaknaa Kashmir-a eptu ṭangrual pawl, 'People' Alliance' din a nih hnu lawkah Abdullah kohna hi ED lam chuan an thawn nghal tih sawiin, hetiang thil hi a thlen pawh an lo ringlawk tih an sawi bawk. 

Centre-a BJP sorkar chuan agency hrang hrangte chu politics lama a hmel­ma­te beihna hmanrua atan a hmang a ni, an ti.