Kolkata doctor case : Kolkata police-ten thu zawh fiah turin BJP MP hlui leh doctor 2 ko

Kolkata khawpuia R.G. Kar Medical College and Hospital-a doctor zirlai pawngsual leh thah a nih chungchang chuan rampumah boruak a la nei lian zel a, kut tuartu doctor hming sawilang leh, thu dik tawk lo thehdarha puh chungchangah Kolkalta police-te chuan BJP MP hlui Locket Chatterjee leh doctor pahnih, Dr Kunal Sarkar leh Dr Subarna Goswami te chu thu zawhfiah turin an ko.

Sarkar leh Goswami hian tualthahna thleng chhui hna thawh danah leh post-mortem result-ah thu dik tawk lo an thehdarh niin police-te chuan an sawi. Goswami hian media interview a neihah post-mortem report a en thu leh, hetah hian hmeichhe pawngsual tawktu taksaah hian mipa chi, semen 150 mg hmuh a nih thu sawiin pawngsual rawn ni ngeia a lan thu a sawi a ni. Mahse Kolkata police-te chuan he a thusawi hi thu dik lo nia sawiin, thil pawi tak thlen thei thu dik lo sawiah an puh. BJP hruaitu Chatterjee hi an thah tak doctor hming puangzarah an puh bawk.

Police-te chuan mi pathum bakah hian pawikhawihna thleng chungchanga thu dik lo thehdarha puh, mi dang 57 pawh an ko bawk.

Indian Medical Association (IMA) huaihawtin doctor zirlai pawngsual leh thah a nih duh lohna lantirin August 17-ah doctor-ten ram pum huapin darkar 24 nawrh an huaihawt. Union ministry chuan state zawng zawnga police-te chu darkar hnih danah doctor, nurse leh midangten nawrh an huaihawt chungchangah thil awmdan report pe zel turin a hriattir. Nawrh huaihawt chhung hian state tinah dan leh thupek dinhmun uluk taka thlithlai reng a ṭul tih a sawi a ni.