IAS Coaching centre-in fakna dik tawk lo siam vangin pawisa chawi

Delhi-a civil service exam tana coaching institute siam, Sriram's IAS chuan an centre fakna atana advertisement dik tawk lo an hman vangin pawisa Rs nuai thum chawi tir an ni.

Ministry of Consumer Affairs, Food and Public Distribution hnuaia Central Consumer protection Authority (CCPA) chuan Sriram's IAS lakah hian UPSC hnuaia Civil Service Exam 2022 chungchangah an centre fakna atana dik lo an hman vangin action hi an la nghal tih a sawi.

Ministry chuan, "Coaching institute leh online edtech-in anmahni in fakna hmanga thlalak leh hming tarlanah te an centre tih larna leh pantu an ngah theih nana zirlai hlawhtling an tarlan te chu candidate ngai rengte an nih bakah, course hrang hrang leh an zir hun chhung pawh sawi lan a ni lo bawk a ni," a ti. Hei hian Consumer Protection Act, 2019 chu a kalh tih a tarlang bawk.

"Advertisement diklo leh rin tlak lo hmanga inbumna lakah Consumer Protection Act, 2019 chuan consumer-te dikna leh chanvo a humhim sak a ni," tiin he thutlukna siam a nih chhan a sawi.

Sriram's IAS hian an advertisement chhuahah hian, an coaching institute aṭangin mi 200 chuang chu UPSC Civil Service Exam 2022 selection a tlinga sawiin, "India ram chhunga UPSC/IAS zirna ṭha ber' tiin a inchhal a ni. Mahse he an in chhalna tichiang tura report an thehluhah hian UPSC CSE 2022-a zirlai hlawhtling 200 an tih aṭang hian 171 te chauh an tarlang thei a ni.

Heng zirlai 171 an tarlan zingah hian 102 te chu Free Interview Guidance Programme (IGP) ami niin, 55 te chu Free Test Series aṭangin a ni a, a dang pakua pawh hi General Studies classroom course leh panga dang hi state hrang hrang sorkar hnuaia MoU an neih puia free coaching a kal te an ni bawk. Heng an nihna dik tak hi advertisement-ah hian sawilang loin, consumer hipna turin an lo siam chawp a ni, tiin Ministry chuan a sawi.