Mpox chungchangah review meeting nei

World Health Organisation (WHO)-in Mpox, monkeypox tia sawi ṭhin leng mek Public Health Emergency of International Concern-a a puan hnuah, sorkar laipui chuan he hri leng chungchangah hian Inrinni liam ta khan review meeting a nei.

Union health minister JP Nadda chuan review meeting hi hoin, India ramah Mpox vei hi tunah chuan hmuh an la awm lo tih a sawi. "Sorkar laipui chuan he natna darh tur venna atan ruahmanna ṭha tak a siam dawn a ni," a ti. Union Health Ministry chuan thil awmdante uluk taka a thlithlai reng thu leh, mipuite hriselna dinhmun a ngaihven reng thu a sawi.

Meeting-ah hian mpox hri laka invenna tura fimkhur a ṭul thute sawiin, airport, seaport leh ground crossing-a health unit-ah ruahmanna fel fai tak siam te, testing laboratory 32 siam te, health facility thuam chakte an rel a ni. Tuna ram chhunga he hri vei hi hmuh la awm lo mah se, ram pawn aṭanga rawn lut aṭangin vei hi an la awm mai thei a ni tih sawiin, hemi rual hian ram puma a darh theihna erawh a hniam hle niin ministry chuan a tarlang.