India-in hun harsa ber lai a tawng mek : Sonia Gandhi

Congress interim president Sonia Gandhi chuan Pathianni khan meeting an neihnaah, khawvela democracy ram lian ber India-in hun harsa ber lai a tawn mek thu a sawi.

Sonia chuan heng hun harsate hi - loneitute tana ṭha lo farm law pathum, Covid-19 hri leng hluar mek, ram economy chhe zel leh hnam hnuaihnung zawk Dalit (Scheduled Castes)-te laka chet dik lohna te a nih thu party general secretary leh state-in charge meeting-ah a sawi. 

Farm law pathum te chu black law an nih thu sawiin, Sonia chuan sorkar laipuiin  India mite dikna a laksak bakah, an dikna chu mi challang leh thil tithei (capitalist)-te kutah a hlan a ni, a ti. Kum 1960-70 chho vel khan Congress sorkarna hnuaiah India chuan green revolution an hmachhawn a, lo neih lamah hmasawnna a thleng a, mahse farm law pathum siam tharte chuan hmasawnna te hi a tiṭhuanawp dawn a ni, a ti.

"Ramchhunga inhlawhfa mi vaibelchhe tel awm te, mi ram hawha ei zawngte, loneitu tenau leh lian te, hna hahthlak thawka ei zawngte leh dawrkai tenaute chu sorkar chuan a rapbet mek a ni," tiin Congress hruaitu chuan a sawi. President Ram Nath Kovind-a'n farm law a pawm tak te hi Congress bakah political party dangte pawhin an duh lo a, thla hlui aṭang tawh khan nasa takin an lo dodal tawh a ni.

India chuan Covid-19 hri leng a hmachhawn mek thu Sonia chuan a sawi a, he hri leng dona kawnga prime minister Narendra Modi kaihhruai sorkar hmalakna chu a chhe hle niin Sonia chuan a sawi bawk. "Modi chuan hri leng hi ni 21 chhungin kan hneh ang a ti a, mahse vawin thlengin hneh a la ni lo," tiin Sonia chuan a sawi. He hri leng vang hian nitina inhlawhfa hna chan tam tak an awm a, chhawmdawl an ngaih laiin sorkar laipui chu a thlirtuah a la ṭang ringawt a ni, tiin a sawi. 

India Gross Domestic Product (GDP) chu a chhiat hle thu Sonia chuan sawi bawkin, "State pek tur GST compensation pawh sorkar laipui chuan a pe hlei thei lo, hri len hma pawhin India economy chu a chhe tawh a ni," a ti. "Hri a leng a, ramchhunga ṭhalai tam tak hna nei lo an tam phah a, mi vaibelchhe 14 dawnin hna an chan tawh a ni," tiin hemi kawngah hian sorkar chu thlirtuah bawk a ṭang leh a ni, a ti.