Masarat Alam-a chungchang Parliament-ah sawichhuah a ni

Jammu and Kashmir Chief Minister Mufti Mohammad Sayeed kaihhruai PDP-BJP ṭang­rual sorkarin India aṭanga inlakhran duhtu, Hurriyat hruaitu Masarat Alam a chhuah zalen chung­chang chu nimina Parliament inkhawmah eptu pawlte'n an sawi­chhuak a, sorkar laipui chu he thil thleng hi sawifiah turin an phut.

Union Home Minister Rajnath Singh chuan eptu pawlte hi chhangin, J&K sorkarin Alam a chhuah dawn hian sorkar laipui a rawn lo tih a sawi a, state sorkar pawh Alam chhuah a nih chhan sawifiah tura hriattir a ni, a ti.

Lok Sabha-a thu a sawiah, Rajnath Singh chuan ram himna chung­changah hlauthawn tur a awm lo thu a sawi a, hemi rual hian Alam chhuah a ni mai chu sorkar laipui pawhin a ngai thutak hle a, state sorkar chuan a sawifiah ngei a ngai a ni, a ti. J&K insawifiah danah a lungawithlak tawk loa an hriat chuan thurawn na tak pek ngei an tum tih a sawi bawk.

Prime Minister Narendra Modi pawhin thu sawiin, J&K CM chuan state-a a thawhpui, BJP emaw sorkar laipui emaw a rawn lo tih a sawi. PM chuan J&K-ah chuan BJP telna ṭangrual sorkar a din avangin state sorkar thutlukna dik lo siamah pawh sorkar laipui mawhpuh a ni chu a pawm thu a sawi a, hemi rual hian ram inpumkhatna tichhe zawng hmalakna chu an enliam mai dawn lo tih a tiam nghal.

Hetihlai hian J&K-a BJP nena ṭangrual sorkar siamtu, People's Democratic Party (PDP) chuan Alam chhuah a nih danah dan kalha thiltih engmah a awm lo tiin a sawi a, hei hian BJP nen an inkar boruak pawh a chhe lo tih a sawi. PDP hruaitu Firdous Tak chuan, "Dan phal loa thiltih a awm lo a, Masarat Alam hi a thubuai zawng zawng­ah bail-a chhuah tir a ni," a ti. PDP chuan inpumkhatna ṭha siam a duh a, state-a muanna a awm theihna turin sorkar chuan thutlukna a siam thei a ni, a ti.

Masarat Alam hi kum 2010 khan India dodal zawnga Kahmir Valley-ah nawrh a huaihawt avangin man a ni a, Baramulla jail-ah tantir a ni. Chhuah zalen a nih avang­a party hrang hrangte'n an sawiselna chu engah vak mah a ngai lo tih sawiin, Alam chuan, "Naupang ka nih aṭangin ka hun tam zawk hi jail-ah ka hmang a, min man leh a nih pawhin mak ka ti chuang lo ang," a ti.