Mamata-in PM Modi a hmu

West Bengal Chief Minister Mamata Banerjee chuan nimin khan New Delhi-ah Prime Minister Narendra Modi a hmu.

Banerjee hi state finance minister Amit Mitra leh Chief Secretary Sanjay Mitra te'n an ṭawiawm.

February 25 khan Banerjee hian PM hnenah lehkha thawnin, an state leiba neihte ngaihdam dan tur ngaihtuah tura inbiakna neihpui turin a ngen a ni.

West Bengal CM hian Pathianni-a Kolkata-a VIP Road flyover a hawnnaah, kum thum chhung zet an state leiba ngaihdam tur chungchang hi dawhthei takin an nghak tawh tih a sawi. An leiba cheng viabelchhe nuai 1 chu an rul tawh tih a sawi bawk.

Nimina PM nena an inkawm hnua chanchin thar lakhawmtute a kawmnaah, Banerjee chuan an state sum dinhmunte PM hi chiang takin a hrilhfiah tih a sawi a, state hmasawnna kalpui chhunzawm zel a nih theihna tura an leibate ngaidam tura a ngen thu a sawi.

PM pawhin West Bengal chu leiba ngah ber ni mah se, sorkar inrelbawl leh hmasawnna kalpui danah an hnathawhte a fak tiin CM chuan a sawi a, "A theih anga ṭanpui min lo tiam a ni," a ti.

Banerjee chuan, "PM hian state hrang hrangte'n leiba an neih chungchangte sawiin, chinfel dan kawng an zawn mek thu min hrilh," tiin, sum indaihlohna avanga Kolkata-a Metro Rail project tihtawp lailawk chungchangte pawh an sawidun thu a tarlang.