Shiv Sena-in Alam-a chhuahtu J&K CM thubuai siamsak an phut

Jammu and Kashmir Chief Minister Mufti Mohammad Sayeed-a'n inlakhran duhtu, Hurriyat pawl hruaitu Masarat Alam-a jail aṭanga a chhuahtir chungchang chu party hrang hrangte'n an la sawisel zui zel.

Central-a BJP thawhpui, Shiv Sena chuan J&K CM hi 'firfiak' Alam a chhuah zalen avangin a laka thubuai siamsak turin an phut. Shiv Sena hotu Uddhav Thackeray chuan, "Mufti Mohammad Sayeed hian firfiak chhuah zalen turin dikna a nei em ni? Alam hi firfiak a ni a, ram dodal zawng chea puhna tam tak tawkin vawi eng emaw zat man a ni tawh bawk. Tuna kan rama thil thleng mek hi a ṭha lo hle a ni," a ti.

Thackeray chuan, "Sayeed hian mi firfiak a chhuah zalen chhan hi ram mipuite a hrilhfiah a ngai a ni. Amah pawh hi thubuai siamsak tur a ni. Awlsam taka firfiakte chhuah an ni mai hi kan ram security force-te hmusitna a ni," tiin a sawi.

CM Sayeed-a party, People's Democratic Party (PDP) in J&K-a ṭangrual sorkar a siampui, BJP chuan Alam chhuah a ni hi a sawisel bawk a, nimin khan BJP chuan India laka hel, Alam-a chhuah zalen a nih avanga an lungawiloh thu CM Sayeed hi an hrilh. Mahse PDP chuan a thutlukna siam tawh hi ngaihtuah nawn leh a tum lo tih sawiin, boruak muanawm a awm theih nan a ṭul anga hma la turin state sorkar chuan thuneihna a nei a ni, a ti.

Masarat Alam chhuah a nih chungchangah ṭangrual sorkar siamtu, PDP leh BJP ngaihdan hi inang lo mah se, an thawhdunna erawh a nghawng dawn loh thu PDP chuan a sawi bawk. Hetihlai hian Union Home Miniser Rajnath Singh chuan PDP-BJP thawhdunna ai chuan India ram himna an ngai pawimawh zawk tih a sawi thung.

PDP chuan Alam chhuahna tura thutawp siamtu an ni lo tih sawiin, an state-a ni 49 chhung Governor's Rule hman laia thutlukna hi siam a ni, an ti leh. Alam chhuah tur hian Home Ministry-a Additional Secretary chuan Jammu-a District Magistrate hnenah a lo ngen tawh niin an sawi.

Nimina Parliament inkhawmah Alam chhuah a nih chungchang hi eptute'n an sawichhuak leh a, J&K sorkarin inlakhran duhtu dang mi 800 te chhuah zalen leh a tum nia sawiin, hei hi state sorkarin hian sorkar laipui a hriattir tawh em tih an zawt bawk.