Yadav leh Bhushan-te'n party chak lohna turin an bei: AAP

Delhi-a rorellai, Aam Aad­mi Party (AAP) chhung­a buaina chu a la reh thei lo a, an party kalphung leh party hotu Arvind Kejriwal-a sawiseltu hruaitu pahnih Prashant Bhushan leh Yogendra Yadav-te chu kumina Delhi assembly inthlan neih­ah khan AAP chak lohna turin an bei niin an puh leh.

Bhushan leh Yadav-te hi AAP kalphung leh Kejriwal an sawisel hnuah party thuneitu sang, Parliament Affairs Committee (PAC) member an nihna aṭangin ban an lo ni tawh bawk.

Nimina AAP hruaitu pali-te chuan thuchhuah a siamah, Lokpal movement kalpui anih aṭanga Kejriwal-a nena lo thawkdun tawh, Prashant Bhushan chuan Delhi assembly inthlan neih dawn khan state danga an party hruaitute chu hmuin, Delhi-a campaign pui lo tura hmin vek a tum a ni, an ti. Supreme Court lawyer hmingthang tak, Bhushan hian an party tana mipuite'n pawisa an thawh ṭhin pawh lo dan a tum tih an sawi bawk.

Bhushan hian state danga AAP hruaitute hnenah, "Kei pawh AAP tan ka campaign dawn lo a, nangni pawh in campaign tur a ni lo. Arvind hi zirtirna pek a ngai a ni," a ti. Bhushan hian assembly inthlan hma khan Kejriwal chu press conference buatsaih a, an party hming tihchhiatah a lo vau tawh bawk niin a sawi.

Prashant Bhushan leh Yogendra Yadav-te chuan AAP-in a puhna chu thu dik lo a nih thu sawiin, an puhna chung­chang hi an chhan thuai tur thu an sawi. Bhushan chuan ziaka press statement a siam tur thu leh, thu dik tak chu mipuite hriatah a puangzar vek dawn tih a sawi.