Kolkata doctor case : SC-in doctor-te pualin national task force a din

Kolkata-a doctor zirlai hmeichhia pawngsual leh thah a nih avanga ram chhunga doctor-ten an himna ngaihtuah tura an nawrna kal zelah, Supreme Court chuan nimin khan an hnathawhna hmuna medical lama hnathawkte himna tur ngaihtuah turin national task force a din.

Natoinal task force-ah hian doctor langsar tak takte dahin, anni hian doctor-te himna tura rawtna an neihte chu an thehlut dawn a ni. NTF hi kar thum chhungin report hmasa thehlut a, final report chu thla hnih chhunga thehlut tura tih an ni. Task force member atan hian Surgeon Vice Admiral R Sarin, Dr D Nageshwar Reddy, Dr M Shreenivas, Dr Pratima Murty, Dr Goverdhan Dutt Puri, Dr Saumitra Rawat, Prof Anita Saxena, Head Cardiology, AIIMS Delhi, Prof Pallavi Sapre, Dean Grant Medical College Mumbai, Dr Padma Srivastava, Neurology department, AIIMS te ruat an ni.

Chief justice of India D.Y. Chandrachud kaihhruai bench chuan nimin khan RG Kar Medical College and Hospital, Kolkata-a doctor zirlai pawngsual leh tualthah chungchanga suo motu case chu a ngaihtuah a ni. Bench chuan he pawikhawihna thlenga FIR thehluh a nih mai loh chu thil ngaihtuah ngai tak a ni tih a sawi.

Pawikhawihna a thlen hnua Hospital kawta mipui pungkhawmin tharum thawhna an thlen leh, Kolkalta police-ten an tlanchhiatsan nia sawi chungchang pawh bench chuan a ngaihtuah a, hospital-a venhim hna thawk tura CISF mi leh sa dah turin thupek a ti chhuak bawk.

DY Chandrachud kaihhruai chuan pawikhawihna rapthlak tak thlenga West Bengal sorkar leh Hospital thuneituten hma an la chak tawk lo chu a lungawi thlak loh hle tih a sawi. 'Medical profession-ten khawih an tawk fo, a bikin hmeichhe doctor-te bitum an ni ngun bawk. He hna thawktu hmeichhiate an pung chho zel a, he ram hian hetiang thil thlengte thlak danglam tur hian midangin pawngsual an tawh leh kher hun a nghak tur a ni lo," tiin bench chuan a sawi.

RG Kar Hospital principal hlui eiruk thubuai siamsak

Kolkata Police-te chuan doctor zirlai pawngsual leh thah a nihna, RG Kar Medical College and Hospital Principal hlui Sandip Ghosh chu eiruk thubuai an siamsak.

State police hian sorkar hospital-a sum hman dan dik tawk lo awm tia June thlaa complaint thehluh a nih aṭangin he thil hi an chhui tawh a ni. Hemi atan hian West Bengal sorkar chuan Special Investigation Team (SIT) chu dinin, kum 2021 aṭanga RG Kar Medical College and Hospital-a thil felhlel awm nia sawite, Ghost enkawlna hnuaia sum chetvel dan fel tawk lo awmte an chhui chiang a ni.

Ghost hi RG Kar Hospital-a pawngsual leh tualthahna a thlen aṭanga ni hnih hnu lekah Principal a nihna aṭang hian a bang a ni. CBI chuan he thutlukna a siam chungchang leh, Hospital-a thil thleng kaihhnawihah hian thu zawtfiahin, ni li chhungin darkar 53 zet zawhna hrang hrang an lo zawt tawh bawk.