EC-in J&K inthlan neih hun tur a puang

Election Commission of India (ECI) chuan nimin, August 20 khan Jammu and Kashmir assembly inthlan neih hun tur a puang a, inthlan hi thawh thuma neih a ni ang.

ECI chuan Lieutenant Governor-in hriattirna a tih chhuah hnuah, Jammu & Kashmir Legislative Assembly inthlan neih tur hi a ti chhuak a ni. Inthlan thawh khatna hi assembly seat 24 - Kashmir Valley-a assembly seat 16 leh Jammu region-a seat 8-ah September 18-ah neih a ni ang. Candidate-te chuan August 27 thleng nomination paper an thehlut thei ang a, hengte hi August 28-ah enfiahin, inhnukdawk duhte tan August 30 thleng hun hawn a ni.

Jammu and Kashmir-ah hian assembly seat 90 awmin, inthlan hi thawh thuma neih a ni ang. September 25 leh October 1-ah thawh hnihna leh thawh thumna hi neih a ni dawn a, October 1-ah result puan a ni ang. Tun ṭuma inthlan neih tur hi kum 2019-a BJP sorkarin J&K tana special status pekna, Article 370 a ṭhiah hnu leh, Jammu and Kashmir state chu Union Territory pahnih - Jammu and Kashmir leh Ladakh-a a ṭhen hnua assembly inthlan neih hmasa ber tur a ni.

Assembly inthlan hnuhnung ber, 2014-a neihah khan BJP leh People's Democratic Party (PDP) chuan ṭangrual sorkar an din a, mahse 2018 June thlaa BJP chu inhnukdawkin, hemi kum November thla hian hetih laia Governor Satya Palik chuan Assembly ṭhiatin, hemi hnu hian J&K hian Assembly a nei zui ta lo.