Khawvela ni khata hri kai hmuh chhuah tam ber record INDIA-AH A THLENG

Hripui kai tawh zingah dam an tam tawh thu tarlan ni fo mah se ni khata hmuh chhuah thar hi India ramah an tam em em reng a, nimina Ministry of Health and Family Welfare tihchhuahah phei chuan India chuan a duhawm loh zawngin World Record a siam a, ni khata hri kai hmuh chhuah tam ber record US-a lo thleng tawh chu India hian a khum a ni.

Nimina MoHFW report aṭanga a lan dan chuan ni khata hri kai hmuhchhuah thar mi 77,266 lai an awm a, hei hi khawvel record a tling niin India media hrang hrang chuan an tarlang a ni. 

Covid-19 chungchangah hian data lakhawmtu hrang hrang an awm avangin India-in khawvel record a siam anga tarlan pawh hi mi ṭhenkhat data nen chuan a inmil chiah lo a, mahse heti chung hian India media lian tam ber chuan US khumin India hian global record thar a nei niin an tarlang nasa hle. Hetih lai hian report ṭhenkhat chuan hri kai hmuh chhuah tam ber ni chu July 25-a US-a thleng niin, mi 78,427 hmuh an nih thu an tarlang ve bawk. 

India ramah hian nimin report tihchhuah thleng khan Covid-19 kai mi 33,87,500 an awm tawh a, darkar 24 chhungin 60,177 chu dama puan leh niin hei nen hian mi 25,83,948 chu dama puan an ni tawh a, thihpui hi mi 1,057 an awm belh leh avangin mi 61,529 an thi tawh a, mi 7,42,023-in hripui an la kai mek a ni.

India ram hi khawvela hripui kai tam ram pathumna a la ni a, enkawl dam tawh rate chu 76.24% niin thihpui rate chu 1.83% a ni thung. Hri kai hmuh tawh tamna ram pathumna ni mah se, hri kai awm mek (active case) ah chuan Brazil pelin a tamna ram pahnihna a ni tawh a ni. 

Indian Council of Medical Research (ICMR) report-ah hian sample 9,01,338 endik a ni leh tih an tarlang a, hripui len tirh aṭanga nimin thleng khan sample 3,94,77,848 an endik tawh. Sample endikna atana laboratory pawmpui 1,564 an nei tawh a, heng zinga 998 hi sorkar laboratory niin 566 chu private laboratory a ni bawk.

India State/ UT zinga hri kai tamna Maharsahtra-ah chuan nimin thleng khan hri kai nuai 7.3 chuang an awm tawh a, mahse heng zinga nuai 5.3 chu an dam leh tawh a, mi nuai 1.7 velin hri an la kai mek. 

Tamil Nadu-ah hri kai hmuh chhuah sang nga chuang an awm leh avangin nimin thleng khan hri kai nuai 4.03 chuang an awm tawh a, Tamil-ah hian nuai 4 an kai vawi khatna a ni. Nuai 3.4 chuang lai enkawl dam an nih tawh avangin mi 52,364-in hri an la kai a, mi 6,948 an thi tawh thung.