SC-in Bihar inthlan hun sawn hla tura ngenna hnawl

Supreme Court chuan Bihar assembly inthlan neih tur chu an state-a hri leng a reh hma chu sawn tura ngenna thehlut chu nimin khan a hnawlsak a, hripui leng mek chu inthlan hun sawn phahna tur a ni lo tih a sawi. 

Justice Ashok Bhushan kaihhruai Supreme Court bench chuan inthlan hun sawn tura ngenna, petition thehluh hi a ngaihtuah a ni. Petition thehluttu Avinash Thakur chuan Covid-19 leng mek vangin Representation of the People Act hmangin Chief Election Commissioner-in a duh chuan inthlan hun hi a sawn hla thei a ni, a ti. 

Bench chuan Election Commission of India-in thil engkim ngaihtuahin, ruahmanna fel tak hnuaiah inthlan hi a buatsaih dawn a ni, a ti. Hemi rual hian ECI hian inthlan neih hun tur chungchangah thuchhuah pawh engmah a la nei lo a, petition thehluh nan pawh a la hma niin an sawi bawk.