Coal scam: Thu zawhfiah turin PM hlui koh a ni

Prime Minister hlui Manmohan Singh chu nimin khan lungalhthei phalna pekchhuah dana thil dik tawk lo awm kaihhnawihah thu zawhfiah turin Central Bureau of Investigation (CBI) special court-ah koh a ni.

PM hlui hi Hindalco hnena Talabir-II block-a phalna pek a nih chung­changah koh a ni a, phalna pek a nih lai hian Manmohan Singh hian coal portfolio a chan lai a ni. Nimina special court-ah koh a nih hian a rualin coal secretary hlui PC Parakh, industrialist Kumar Mangalam Birla leh midang pathum koh an ni bawk.

Court chuan Prevention of Corruption Act hnuai criminal conspiracy hmangin PM hlui leh midangte hi a ko a ni.

Manmohan Singh chuan court-a koh a nih dan chuan a tihrehawm hle tih a sawi a, hemi rual hian heng thil hi chu thleng thei a ni tiin, dan hmanga enfiah tur pawhin a inhawng tih a sawi. PM hlui chuan court order hi a hmu lo a, a ukil-te biak­rawn hunah a la chhan tur thu a sawi bawk. Thu dik tak chu hailan a la ni dawn a ni, a ti.

Coal scam chung­chang chhuitu, CBI-in final report a thehluh hnuah court order hi tihchhuah a ni. An thil chhui lai hian CBI chuan Singh hi kum 2005, May 7 leh 2005, June 17 inkara Birla-in Hindalco tana Talabira-II coal block a dilna lehkha a thehluh chungchangah, Ministry of Coal leh PMO-ah thil awmdante an zawt a ni.

CBI hian witness zinga pakhat, Neyveli Lignite Corporation Chairman and Managing Director hlui, S Jayaraman statement pawh an la bawk.