Lok Sabha-ah Land Acquisition Bill pass a ni

BJP kaihhruai NDA sorkarin Land bill a siam danglam, Land Acquisition (amendment) Bill 2015 chu Lok Sabha-a pass a ni. Bill pass dawn hian eptu member-te'n an dodal nasa hle a, voice vote hmanga pass niin pass a nih hian Congress leh BJD member-te chu house aṭangin an chhuak tau.

Sorkar laipuiin land bill a siam danglam dan hi eptu pawl bakah, NDA hnuaia BJP thawhpui party ṭhenkhat pawhin nasa takin an lo sawisel tawh a ni. Hei vang hian Thawhlehnia Lok Sabha-a bill pharh a nih hma hian sorkar laipui chuan eptute'n an pawm theih turin bill a siam danglam tawh siamṭhatna pakua a siam leh a ni.

Land amendment bill hi NDA-a tello zingah AIADMK leh TRS chuan an thlawp a, AIADMK hian MP 37 neiin party zingah Lok Sabha-a member ngah pathumna a ni.

Lok Sabha-ah land acquisition bill hi tlang mah se, Rajya Sabha-ah ngaihtuah a ni leh dawn. Rajya Sabha-ah hian NDA hi minority a nih avangin he bill hi tlang tur chuan harsatna a tawh ngei rin a ni.