AAP MLA-te'n Yadav leh Bhushan ban turin Kejriwal hnenah an ngen

Delhi-a rorellai, Aam Aadmi Party (AAP) MLA eng emaw zat chuan an party kalphung leh party hotu, Arvind Kejriwal-a sawiseltu, Yo­gendra Yadav leh Pra­shant Bhushan-te chu party aṭanga hnawt­chhuak turin Kejriwal-a hnenah an ngen.

MLA-te hian an party hotu lu ber, Delhi Chief Minister Kejriwal-a chu lehkha thawnin, an party tihchhiat tuma puhin Yadav leh Bhusan-te bakah, Bhushan-a farnu Shalini Gupta-te chu an party aṭanga hnawhchhuah an duh thu an tarlang. Shalini Gupta hi party NRT team member-te chu email thawnin, party tana donation an pek ṭhinte ti tawp turin a ngen nia puh a ni.

Party senior leader, Sanjay Singh chuan MLA-te lehkha thawn hi party-in ala ngaihtuah dawn tih a sawi.

Kejriwal hnena leh­kha an thawnah MLA-te chu an hming ziak tura nawr luih an ni tia puhna chu chhangin, Kar­wal Nagar MLA Kapil Mishra chuan, "Tumah nawrh luih an ni lo a, an duhthu ngeia hming ziak vek an ni. Tun thlengin hming ziah duh loh an la awm lo a ni," a ti. Mishra chuan an party tihchhiat tumte chu eng mi pawh ni se an ngawihsan mai dawn lo tih a sawi bawk.

AAP MLA hlui Rajesh Garh pawhin party member tam zawk chuan Yogendra Yadav-a'n media mite hnena an party chungchang a sawidanah an lungawi lo hle tih a sawi.

March 28 hian AAP National Council meeting neih a ni dawn a, he hunah hian party chhunga buaina thleng mek hi ngaihtuahin, thutlukna pawh an siam ang.