Mamata cartoon thehdarhtu hnenah Rs 50,000 pe tura tih a ni
Calcutta High Court chuan West Bengal sorkar hnenah state Chief Minister Mamata Banerjee cartoon a thehdarh avanga man tawk tawh, Jadavpur University professor Ambikesh Mahapatra chu thla khat chhunga zângnadawmna Rs 50,000 pe turin a hriattir.
West Bengal Human Rights Commission rawtna thehluh behchhanin, Justice Dipankar Dutta chuan state sorkar chu Mahapatra leh ṭhenawma mi, Subrata Sengupa-te chu zângnadawmna hi pe ve ve turin a ti. Hei bakah hian Purba Jadavpur police station-a police officer pahnihte chunga action la turin a ti bawk.
Mahapatra chuan kum thum chhung a lo buai phahna chu a tawp dawn ta tih sawiin, cartoon a thehdarh chu thilsual nia a ngaih loh thu a sawi.
Kum 2012 April 12 khan professor Mahapatra hi Mamata Banerjee sawiselna lam hawia cartoon ziah mi 65 hnena email hmanga thawndarha puhin sawisak a ni. April 19 khan police-te'n manin court-ah hruai a nih hnuin bail-a chhuahtir a ni. Bail-a chhuah a nih theih nan hian police-te chuan Communist Party of India (Marxist) a ni tih an ziah luihtir niin a sawi.