BJP-in thawhdunna tihtawpah PDP a vau

Jammu and Kashmir-a PDP kaihhruai ṭangrual sorkarin a thawhpui BJP thurawn la loa sorkar laka hela inlakhran duhtu, Hurriyat hruaitu Masarat Alam a chhuah zalen chung­changah PDP chuan a kalphung a siamṭha a nih loh chuan thawhdunna tihtawpah BJP in a vau.

J&K Chief Minister, PDP hruaitu Mufti Mohammad Sayeed chuan Alam hi a chhuah zalen a, hei hi party party hrang hrang bakah ṭangrual sorkar a siampui BJP pawhin nasa takin a sawi­sel zui a ni.

Alam chhuah a nih chungchangah hian BJP President Amit Shah chuan Thawhlehni khan J&K BJP unit hruaitu leh Deputy Chief Minister Nirmal Singh a hmu a, hemi hnu hian CM Sayeed leh PDP hnenah thu na takin a thawn zui a ni.

BJP President chuan PDP hnenah hian party pahnihte'n an sawiho hma chuan thutlukna a siam a remti tawh dawn lo a, hei bakah hian ram himna khawih thei thil, tuna Masarat Alam a chhuah zalenna ang hi a ngaithiam dawn tawh lo tih a hrilh. PDP chu a insiamṭha a nih loh chuan J&K-a an thawhdunna chu tihtawpah a vau a ni.

India laka inlakhhan duhtu Masarat Alam chhuah zalen a nih dan­ah BJP hruaitute pawh an lungawi lo hle a, hetiang thil hi a thlen nawn an duh tawh lo tih an sawi. CM Sayeed pawhin Thawhlehni khan Home Minister Rajnath Singh a hmu a, BJP remtihna tel loin midang chhuah an ni tawh lo ang tih a tiam.