Dalit leh adivasi group-ten Bharat bandh huaihawt; Eptu party hrang hrangin bandh an thlawp

Dalit leh Adivasi organisation hrang hrang chuan tun hnaia Supreme Court-in reservation chungchanga thutlukna a siam, SC/ST quota aṭanga creamy layer paih tura a tih duh lohna lantirin nimin khan ram pum huapin nawrh an huaihawt. Supreme Court chuan state-te chu Scheduled Castes (SC) leh Scheduled Tribes (ST) chhunga sub-classification siamsak a phalsak a ni.

Bharat bandh huaihawt hi eptu pawl, Jharkhand Mukti Morcha (JMM), Congress, Rashtriya Janata Dal (RJD) leh Bahujan Samaj Party chuan an thlawp thu sawi.

National Confederation of Dalit and Adivasi Organisations (NACDAOR) chuan judge pasarih awmna, Supreme Court bench-in reservation chungchanga thutlukna a siam hi a hmaa judge pakua awmna bench, Indira Sawhney case ngaihtuahtuin India rama reservation framework a duan ngaih pawimawh lohna a ni, an ti.

NACDAOR chuan Supreme Court thutlukna chu SC, ST, leh Other Backward Classes (OBCs) te constitutional rights a tiderthawng tih sawiin, sorkar laipui hnenah pawm lo tur leh, reservation humhimna tur parliamentary act thar siam turin an phut a ni. Hei bakah hian sorkar hnathawkte caste-based data ti chhuak a, Indian Judicial Service-ah SC, ST leh OBC category tana 50% dah an phut bawk.

Bharat bandh huaihawt vang hian Odisha, Jarhkhand, Bihar leh state dang ṭhenkhatah railway leh road service a buai phah a, Rajasthan, Kerala leh Madhya Pradesh-ah school, bazar leh service dangte khar a ni bawk. Bihar khawpui Patna-ah chuan nawrh huaihawta pungkhawmte leh police-te innawrin, police-te chuan pungkhawmgte tiangin an vua a ni.