Kolkata doctor case : SC-in social media aṭangin doctor hming leh thlalak paih vek turin hriattir

Supreme Court chuan Thawhlehni khan thuchhuah siamin, RG Kar Medical College and hospital-a rawng taka pawngsual leh thah, doctor zirlai thlalak, hming leh video te chu social media platform hrang hrang aṭanga paih vek turin thupek a chhuah.

Chief Justice of India DY Chandrachud kaihhruai bench chuan, mipat hmeichhiatna lam rawngkaia pawikhawihna tawktu nihna tarlan chuan Supreme Court-in Nipun Saxena thubuai aṭanga thutlukna a lo siam tawh, pawikhawihna tawktute nihna humhim chungchang a thupek a lo chhuah tawh chu a kalh a ni, a ti. Hei vang hian RG Kar Medical College-a doctor zirlai nihna social media hrang hranga tarlan chu tibo vek turin thupek hi a ti chhuak a ni.

Supreme Court chuan pawikhawihna tuartu kaihhnawih thil hashtag chu elctronic leh social media platform hrang hrang Facebook, Instagram, Youtube leh X ahte a darh nasa hle tih a sawi. "Thlalak leh video clip-te chu media hrang hrangah a darh a, hei hi a ngaihmawhawm hle. Kan zalenna hre reng chungin tih tur chin hriat a ṭul hle a, Nipun Saxena thubuai chungchanga court-in thutlukna a lo siam tawhah mipat hmeichhiatna vanga harsatna tawktu te nihna tarlan leh thehdarh chu a lo khap tawh a ni" tiin a tarlang.

Nipun Saxena thubuaiah hian kum 2018 khan Supreme Court chuan, "Mi tumahin pawikhawihna tuartu hming, thlalak chu print, electronic, social media hrang hrang kaltlangin a tarlang tur a ni lo a, pawikhawihna tuartu nihna pholang thei thil tarlan hrim hrim khap a ni," tiin thupek a lo siam tawh a ni.