Sorkar laipui enkawl damdawi-inah damlo awmpuitu mi pahnih aia tam awm phal lo

Sorkar laipui enkawl damdawi-in hrang hrangah damlo awmpuitu turin mi pakhat emaw, pahnih emaw chauh awm phal a ni tawh dawn a, hei hian damlo tlawh theih hun, visiting hour pawh a huam tel ang.

Union home ministry chuan hriattirna hi central-run hospital hrang hrang, AIIMS leh Institutes of National Importance (INI) hotute hnenah a thawn vek a ni. He thutlukna hi RG Kar Hospital-a doctor zirlai chunga pawikhawhna rapthlak tak a thlen hnua hospital himna chungchang sawiselna leh nawrna tam tak a awm vanga siam a ni.

Damdawi-in hrang hrangah chuan damlo awmpuitu leh kantu a ruala tam tak an awm lohna tura pass system mumal tak siam tura tih an ni a, hei bakah damdawi-in tlawhtute pawh uluk taka thlithlai zel turin an ti bawk. Thawktu hmeichhiate tan duty room him ṭha tak siam a ni tur a ni a, zan lama hmeichhe duty tur pawhin pakhat aia tam dah ni se, an duty laiin ṭhuihhruai/zuitu pek an ni tur a ni a, zan lam an tei velna turah pawh ruahmanna fel tak siamsak an ni tur a ni, tiin health ministry chuan a tarlang. Sorkar damdawi-inte hi private damdawi-in aiin mipui lamin an bawr zawk a, luh leh chhuah pawh a awlsam avang hian phalna nei loa tei lut mai pawh a awlsam zawk ṭhin a ni, a ti.