PM Modi-a'n Poland a tlawh

Prime minister Narendra Modi chu nimin, August 21 khan Poland-ah ni hnih cham turin a zin. Kum 45 hnua India Prime Minister-in Poland a tlawh vawi khatna a ni.

Prime Minister Modi hian India leh Poland-in inlaichinna siam a, palai an intirhtawnna kum 70 denchhenin Poland hi a tlawh a ni. India prime minister zingah Modi hmaa Poland tlawh hnuhnung ber chu kum 1979-a Moraji Desai-a'n a tlawh kha a ni.

Poland-a ni hnih a cham chhung hian Poland ram nena thawhdunna tihngheh leh chak te, hei bakah kawng hrang hranga thawhdunna turte chu PM hian a sawipui dawn a, heng zingah hian defence lama thawhdunna leh cultural exchange te pawh a tel.

Ministry of External Affairs chuan ram pahnihten thawh dunna lian tak tak an lo neih tawh te tarlangin, chung zingah chuan kum 2022-a India-in Operation Ganga hnuaia Ukraine-a Indian zirlai 4,000 chuang a hruai chhuahna kawnga Poland-in a puih dan te, Indopui pahnihna hun laia India-in Polish nunau a lo humhim sak thute sawiin, hengte hi ram pahnihte inzawmna tihngheh na atana thil pawimawh tak a nih thu a tarlang.

PM Modi hian Poland aṭang hian August 23-ah Ukraine khawpui, Kyiv pawh a pan dawn a, Ukraine president Volodymyr Zelensky a kawm dawn a ni.