Final year exam hmachhawn loin pass tir theih loh : Supreme Court
Supreme Court chuan nimin khan thuchhuah siamin, state sorkar leh university-te chuan exam hmachhawn loin final year zirlaite pass tir turin thuneihna an nei lo, a ti.
Covid-19 hri leng karah pawh nise final year zirlaite chuan final year university examination an hmachhawn loh chuan pass tir theih ringawt an nih loh thu SC chuan a tarlang a, hemi chungchangah hian exam hmachhawn loa final year zirlaite pass tir turin state leh university chuan thuneihna a nei lo niin a tarlang bawk.
Nimina Justice Ashok Bhushan hoa SC bench ṭhukhawm chuan University Grants Commission (UGC)-in exam hun a tiha state ten exam an hmachhawn thei loa an inhriat chuan, UGC rawn chunga exam an tih theih hun tur an sawi dun tur a ni, a ti. July thla khan union ministry of human resource development ni ṭhin, tuna Education Ministry tia thlak tak chuan final year leh semester tawp-te university leh college exam neih hun tur atan September 30 a ruat a ni.
UGC leh Education Ministry ṭangkawp chuan zirlaiten exam an neih huna inkaihhruaina, Standard Operating Procedure (SOP) an hman tur chu July 9 khan an tichhuak zui bawk a ni. University Grants Commission chuan exam neih a nih theih nana SOP an chhuah hi zawm ṭhat a nih chuan exam theih lohna tur a awm loh thu a tarlang.