Congress-in Sebi leh Adani Group chhui chian phut

Congress party worker-te chuan Adani Group-te thil dik tawk lo tia an puhna chu Joint Parliamentary Committee (JPC)-in a chhui chian leh, market regulator Sebi bang tura phutin, nimin khan ram chhung hmun hrang hrangah nawrh an huaihawt.

Kum 2023 January thlaa Hindenburg Research report-ah, Adani Group chu sumdawnna a kalpui danah thil dik tawk lo tiin a lo sawi tawh a, hei hi eptu party lam pawhin Parliament-ah pawh an aupui nasa hle a ni. Hindenburg report hian Adani Group chetdan chhui chiang tura tih, market regulator Sebi hotu, Madhabi Buch leh a pasal chuan Gautam Adani-a unaupa, Vinod Adani-an ram pawn lama sum chheprelhah a rukin share an lo nei niin a tarlang bawk. Hei vang hian Sebi hian Adani Group pawh hi a chhui uluk lo a ni, a ti. Mahse Buch-te nupa hian an puhna hi an pha thung.

Congress party chuan Adani megascam chhui chiang tura JPC din an phut thu an sawi a, Sebi hotu pawh bang turin an phut bawk a ni.

Hindenburg report tih chhuah a nih aṭang hian Congress party chuan thil awmdan hi langtlang taka chhui an lo phut tawh a ni. Nimina Jantar Mantar-a nawrh huaihawtte zingah hian Delhi Congress chief Devender Yadav, senior leader Sachin Pilot, Kanhaiya Kumar leh Udit Raj-te pawh an tel. Sachin Pilot chuan, "Thil dik lo in ti lo a nih ngei chuan, engvangin nge joint parliamaent committee chu in din mai loh? Ram pumah hemi chungchang an hriat a ngai a, Congress chuan JPC kaltlangin dik leh langtlang taka chhui chian a phut a ni," a ti.