Rahul Gandhi leh Mallikarjun-te'n J&K an tlawh

Lok Sabha-a leader of opposition, Rahul Gandhi leh Congress party president Mallikarjun Kharge-te chuan ni hnih chhung cham turin Nilaini khan Srinagar an thleng.

Congress hruaitute hi airport-ah party worker ṭhahnem takin an lo hmuak a ni. Gandhi te chuanna lirthei pawh airport kawngah hian tih din hial ngai khawpin an party thlawptute hian an lo chim a, venhim hna thawktute pawh an buai hman hle nghe nghe.

Hruaitu pahnihte hian September 18 aṭanga thawh thuma assembly inthlan neihna tur J&K-ah hian inthlan kaihhnawiha meeting pawimawh nei turin an kal a ni. Nimin zing dar 10 aṭang khan Kahsmir Valley-a district 10-a an party hruaitu leh worker-te meeting an neihpui a, hemi hnu hian media mite an kawm leh bawk. Inthlan lo awm tur atan thawhho dan tur sawipuiin National Conference (NC) hruaitu an hmu dawn nia sawi a ni bawk.

Hetih lai hian Jammu and Kashmir Pradesh Congress Committee president Tarig Karra chuan hruaitu pahnihten an tlawh tur hi assembly inthlan tur puan a nih hma aṭanga lo duan lawk tawh a ni tih sawiin, party dang nena thawh ho dan ngaihtuaha inbiakna nei tur an ni lo tih a sawi thung. Gandhi leh Kharge hi Jammu region-a district 10-a an party hruaitute kawm turin Jammu an pan leh ang.

Hruaitu pahnihte hian J&K-a assembly inthlan lo awm tur atana an inbuatsaihna kalpui dan tur chungchangah party worker-te rawtna siamte an ngaihthlak sak dawn a ni. UT-ah hian kum 10 hnuah inthlan hi buatsaih a ni leh dawn a ni.