Maharashtra-a school zawng zawngah CCTV dah turin hriattir

Maharashtra sorkar chuan Badlapur school-a mipat hmeichhiat lam hawia pawikhawihna a thlen hnuah, state chhunga sikul zawng zawng chu tun thla chhung ngeia an sikul huamchhunga CCTV dah vek turin a hriattir.

School education minister Deepak Kesarkar chuan thupek hi chhuahin, tun thla chhunga CCTV dah hman lote chu hremna pek an ni dawn a, sikul siam tura phalna pek pawh tihtawp sak theih an ni ang, a ti.

Kar liamta khan Badlapur-a kindergarten zirlai, hmeichhe naupang pahnih chu sikul tifaituin mipat hmeichhiatna hawiin a khawih a, he thil thleng vang hian mipui thinrim pungkhawm chuan sikul building hi luhchilhin, bungruate an tichhia a ni. Mipuite hian Badlapur railway station-ah lungawi lohna lantirin rel kawng an dang a, venhim hna thawktu chu lung hmanga beiin, police 17 leh railway police pariatin hliam an tuar. Buaina chhuak vang hian Nilaini khan internet service tihtawp a ni bawk.

Education minister thuchuah chuan, CCTV dah tura thupek tih chhuah chu state chhunga private sikul zawng zawng chuan an zawm ngei ngei tur a ni tiin, hei hi sikul naupang, zirtirtu leh thawktu zawng zawngte tana sikul a him leh zualna tura tih a ni. Thuchhuah zawm lote chuan sorkar aṭanga ṭanpuina an dawn thin tih tawp leh an sikul enkawl zui phal sak loh thlengin hremna pek theih an ni ang, a ti. CCTV footage te chu kar khatah vawi thum tal enfiah ṭhin tur a ni a, hei hi sikul Principal mawhphurhnaah dahin, rinhlelh thil a awm a nih chuan police hriattir nghal tur a ni, a ti.

Department chuan sikul enkawltute hnenah police-te puihnain an thawktu zawng zawngte chanchin chu chipchiar taka chhui chiang vek turin a ti bawk. Police station-ah thawktu chanchin leh thlalakte an pe vek tur a ni, tiin a tarlang.

District Planning and Development Council chuan state sorkar enkawl leh state sum hmanga kal mek sikul zawng zawngte pawh sorkar aṭanga fund an dawna 5% chu CCTV camera leh aṭul dang siamna atan hman a phalsaka, sikul tinte chu harsatna thlen theihna tur complain box dah ṭheuh turin a ti bawk a ni.