Delhi-NCR-a auto leh taxi driver-ten nawrh huaihawt

Delhi leh National Capital Region-a auto leh taxi driver-te chuan service ṭha zawk pek phutin nimin aṭang khan ni hnih awh tur nawrh an huaihawt.

Taxi leh auto union chuan Delhi-NCR ah bike taxi service kalpui a nih aṭangin an service-in a tuar hle tih an sawi a, hei vang hian zangnadawmna ṭha tak pek an phut a ni. Non-commericial number plate neite bike-taxi anga hman phalsak a ni chu tihtawp an phut.

Delhi Auto Taxi Transport Congress Union (DATTCU) president Kishan Verma chuan nawrh huaihawt vang hian autorickshaw leh taxi 80% vel an tlan chhuak lo tih sawiin, Jantar Mantar-ah lungawi lohna hi lantir chhunzawm an tum tih a sawi. Taxi leh auto-te an service na atana permit leh tax-te pek tir an nih laiin, private motor-te chu taxi anga hman phalsak an nih leh chhan an zawt.