Delhi inthlan leh a chhehvel Feb 16-ah CM atan Kejriwal la lut dawn

Aam Aadmi Party(AAP) hotu Arvind Kejriwal chu February 16 hian a ṭum thumna turin Ramlila Maidan-ah Delhi Chief Minister ni turin lak luh a ni dawn.

Thawhlehnia Delhi inthlan result puanah khan AAP hi an chak chiang hle a, Seat 70 awmna Delhi assembly-ah seat 62 zet an la thei a, BJP pawhin hma sawn ve hret mah se seat pariat chiah an la phak a; Congress phei chu an artelukawn nawn leh a ni.

AAP an chak tih a chian hnu khan Kejriwal pawh hi a lawm hle a, an chakna chuan politics lamah hnathawhna ṭha a hrinchhuah dawn thu a sawi hial. 

Prime minister Narendra Modi pawhin Kejriwal a lawm­­puina thu hi twitter-ah a tar­lang nghal a, BJP president JP Nadda, Rahul Gandhi, Ma­mata Banerjee leh midang eng emaw zatin an lawmpui thu hi an tarlang bawk a ni. 

Delhi BJP chief Manoj Tiwari chuan an party chak loh chhanah Delhi BJP president a nihna angin mawh a phurh thu a sawi. 

Inhuatna politics an khel ngai lo tih sawiin, mipuite nek­chepa ni 60 chhung kawngpui dan erawh an la duh lo reng tih a sawi bawk.

Inthlan result puan zan, Thawhlehni zan dar 11 velah khan South Delhi-a Aruna Asaf Ali Marg-ah mi pakhatin silai a hmet puak a, Mehrauli constituency-a hnehna changtu AAP MLA Naresh Yadav chu a bitum nia sawi a ni. 

Naresh Yadav hian hliam a tuar lo a, mahse a volunteer pakhat erawh a thih phah thung a ni. 

Hetihlai hian police-te chuan Thawhlehni zana silai hmehpuahnaah hian politics a inrawlh lo tih an sawi thung. CCTV footage uluk taka an zirchian hnuah Yadav chu silai hmet puaktu hian a bitum a nih loh thu leh volunteer kah hlum tak zawk chu pawikhawihtu hian a bitum ve hrim hrim tih an sawi. Thi pakhat an awm bakah hian hliam pakhat a awm bawk.