Congress-in Manmohan Singh thlavang a hauh

Coal scam chung­changa Central Bureau of Investigation (CBI) in thu zawhfiah tura Prime Minister hlui Manmohan Singh a koh chung­changah Congress party chuan a thlavang hauhsakin, nimin khan party President Sonia Gandhi hoin party hruaitute'n an thlawpna lantirin a chenna in panin kawng an zawh.

Congress president Sonia Gandhi chuan, "Manmohan Singh hi PM hlui a ni a, kan ramah mai ni lo a khawvel pumah mi dik leh fel tia hriat a ni," a ti. Congress party chuan a thlawp tlat a, puh a nihna chu dan ang taka bei letin, an puhna laka a fihlim zia a la lang dawn a ni, a ti.

Manmohan Singh hi kum 2005-a Odisha-a Hindalco hnena Talabira II coal block tana phalna pek a nih chungchangah CBI hian thu zawtfiah turin a ko a ni. Singh chuan, "Hetianga koh ka ni hi hrehawm ka ti hle a, mahse rorelna dik hnuaiah ka fihlim zia hi a la langchhuak dawn a ni," tiin a sawi. Puh a nih chungchanga Sonia Gandhi leh AICC member-te'n an thlawpzia an lantir chu lawmawm a ti takzet tih a sawi bawk.

Congress party chuan BJP chu land acquisition bill a siam danglam chung­changa eptu party leh pawl hrang hrangte beih a tawh laia mipuite rilru lakpenna atana boruak dang vawrhchhuakah a puh.