Bihar CM Nitish Kumar-a'n fiahna a paltlang

Bihar Chief Minister Nitish Kumar chuan Nilaini khan Assembly-ah fiahna a paltlang.

Bihar Assembly-a Nitish Kumar kaihhruai sorkar fiahnaah hian MLA 140 in an thlawp a, a thlawp lo lamah vote tla a awm lo. Sorkar thlawp lamah hian rorellai Kumar-a party, JD(U) bakah RJD MLA 24, Congress 5 , CPI MLA leh independent MLA pakhat ve ve an tel. Eptu pawl lian ber, BJP MLA 87-te chu vote lak dawn hian House aṭangin an chhuak.

Rorellai JD(U) MLA hel zingah Chief Minister hlui Jitan Ram Manjhi tih loh chuan Nitish Kumar an thlawp leh vek bawk. JD(U) hian member 110 a nei a ni. Bihar Assembly-ah hian member 233 an awm mek a, seat ruak 10 a awm.

Sorkar fiah dawn hian a tirah voice vote hmanga tih a ni a, mahse House Leader Vijay Kumar Chaudhury ngenna angin 'lobby division' hmangin lak a ni leh. RJD pawhin sorkar thlawptu leh thlawp lotu lam chiang taka hriat­fiah a nih theihna atan lobby division hman an duh thu an sawi bawk.

Nitish Kumar hi kum 2014 Lok Sabha inthlanpuia an party chetchhiat avangin mawhphurhna lain Bihar Chief Minister a nihna ṭangin a bang a, amah thlaktu atan Jitan Ram Manjhi a ruat a ni. Mahse Manjhi kaihhruaina hnuaia party MLA-te an lungawi tawk loh avangin CM hi thlak leh an duh a, Manjhi chu bang turin an nawr leh a ni. February 20 khan Manjhi hi CM a nihna aṭangin a bang a, February 22 khan Nitish Kumar chu a ṭum li-na atan Bihar Chief Minister atan lakluh a ni leh a, Governor chuan March 16 hma ngeiin assembly-ah sorkar fiah turin a ti a ni.