Nirbhaya documentary petition court-in a hnawl

Sorkar laipuiin kum 2012-a Delhi khawpuia hmeichhe pakhat pawngsual rawn a nih hnua thi ta chanchin film-a siam, Nirbhaya documentary tihchhuah a khap chung­changa petition thehluh chu nimin khan Delhi High Court-ah ngaihtuah a ni, khapna titawp tura ngenna chu court hian a hnawl.

Law zirlai pathum- Virbhor Anand, Arun Menon leh Kritika Padode-te chuan Nirbhaya documentary siamtuin pawngsualtu zinga pakhat, Mukesh Singh a tanna jail chhunga a kawmna leh a thusawi huatthlalaawm tak a telh avangin sorkar laipuiin tihchhuah a khap chung­changah PIL pahnih an thehlut a ni. Petition theh­luttute chuan sorkarin film tihchhuah a khap hian Article 19-in mipuite tana freedom of speech and expression a pek a kalh a ni, an ti.

High Court chuan thu­tlukna pahnih a siam a, he documentary tihchhuah khap hi dan kalh a ni lo a, state-te chuan ṭul bik thilah an khap thei a ni, a ti. Hei bakah hian he film buaina chungchang hi Supreme Court-ah ngaihtuah mek a ni a, hetihlaia film lo tihchhuah hi a ṭha ber lo tih a sawi.

Pawngsualtu zinga mi, Mukesh Singh hian film siamtu, Leslee Udwin-i'n a kawmnaah pawngsual thlen chungchangah mipa aiin hmeichhiate chu a mawhphurtu an nih zawk thu a sawilang a ni.