Sunanda thah thubuaiah Pakistan journalist thu zawtfiah dawn

Union Minister hlui, Congress MP Shashi Tharoor-a nupui, Sunand Pushkar thah thubuai chhuina kalzelah, Delhi Police-te chuan Pakistan journalist Mehr Tarar chu thu zawhfiah an tum.

Delhi Police Commissioner BS Bassi chuan Mehr Tarar hi an thubuai chhui nen hian inkaih­hnawihna a neih avangin biak an tum tih a sawi.

Tarar-i hi Tharoor leh Sunanda-te nupa inkar bo­ruak chhiatna chhan nia sawi a ni a, Tharoor nen inngaihzawnna lam hawi thute an inthawn ṭhin avang­in a nupui Sunanda hi a thinrim hle nia sawi a ni. Sunanda thih hma hian twitter lamah pawh ṭawngkam na takin an lo inbei tawh a ni.

Tarar-i chuan, "Min chhui chiang duh a nih chuan ka inhawng reng a, an duh ang thu min zawt tur pawhin ka inpeih a ni. Mahse India rama kal ka tum rih loh avangin an duh a nih chuan Pakistan-ah rawn kalin min zawt thei ang," a ti. Tarar-i hi Lahore-ah a cheng mek a ni.

Kum 51 mi, Sunanda-i hi kum 2014, January 17 khan delhi-a Leela Palace Hotel-a a room-ah thi a hmuh a ni.