PM Modi-a'n Ukraine a thleng

Prime minister Narendra Modi chuan ni hnih chama Poland a tlawh hnuah, nimin khan Ukraine a thleng.

Prime Minister hi Ukraine president Volodymyr Zelenskyy-a'n a sawm anga zin a ni a, kum 1991-a Ukraine a independent hnuah India Prime Minister zinga tlawh hmasa ber a ni. Modi hian 'Rail Force One' rel hmangin Poland aṭangin Ukraine hi a pan a, darkar 10 vel an tlan. He rel bawk hian Poland lamah a kir leh ang.

Kumin June thla khan Modi leh Zelenskyy te hi Italy-a G7 summit neih kar lakah an lo inbe tawh a, meeting-ah hian Modi chuan boruak ṭha leh muanawm tak hnuaia Ukraine-Russia buaina chinfel a nih theihna atan India chuan theihtawp a chhuah zel dawn tih Ukraine President hi hrilhin, buaina chinfelna chu indona hmunah ni loin, inbiakna hmang chauha neih theih a nih thu pawh a lo sawi tawh a ni.

Russia leh Ukraine inkara inremna leh muanna a awm duh thu sawi ṭhin mah se, India hian Ukraine a run chungchangah Russia demna thu hi a la sawi chhuak lo. Mahse Russia leh Ukraine hruaitute erawh an buaina titawp tura ngenin PM Modi chuan a lo be tawh a ni. July thla khan Modi hian Russia ram a lo tlawh tawh bawk a, hei hi khawthlang lam ramte chuan an sawisel nasa hle. Ukraine President pawhin khawvela democracy ram lian ber hruaitu leh khawvela pawikhawihtu lian berte Moscow khawpuia an inkuah hmuh chuan a ti lawm lo hle tih pawh a sawi lang.

Nimina PM Modi-a'n Ukraine a thlen hnu hian Ukraine President nen Kyiv-a indona avanga naupang thite hriatrengna hmun, National Museum of History of Ukraine-a Martyrologist Exposition an tlawh a, hemi hnu hian one-on-one leh delegation-level talk an nei. Modi hi Hyatt Hotel-ah Ukraine-a India mi awmten an lo hmuak bawk a ni.