J&K Assembly inthlanah Congress leh NC thawk dun dawn

Congress party leh National Conference (NC) te chuan Jammu and Kashmir Assembly inthlan lo awm turah seat awm zawng zawng, seat 90-ah an thawk dun dawn tih Ningani khan an puang.

NC president Farooq Abdullah, Leader of Opposition Rahul Gandhi leh Congress president Mallikarjun Kharge ten Srinagar-a NC leader Farooq-a chenna ina meeting an neih hnuah party pahnihte thawh dun tur thu hi an puang a ni.

Farooq chuan," Kan thawk dun dawn a, seat insem dan tur pawh kan sawi hoin tihfel a ni. Chawhnu lam khan seat 90-a thawh dunna turin kan inrem a ni," a ti. Party pahnihte hian tum thuhmun neiin, 'min ṭhen darh theitu tur zawng zawngte hneh vek thei tur a inthlan lo awm tur beih hi a ni," a ti.

NC leader hian J&K tan state nihna pek let a nih thuai leh, thuneihna pawimawh chelh a, mumal taka keng kawh thei tur sorkar a din thuai a beisei thu a sawi bawk.

Party pahnihte hi Lok Sabha inthlanpui hnuhnung berah khan J&K-ah hian an lo thawk dun tawh bawk a, seat insemin NC hian Kashmir-a seat pathum an chuh a, Congress hian Jammu-a seat pahnihah an chuh ve thung.

Jammu & Kashmir-ah hian kum 10 dawn liam hnuah assembly inthlan hi neih a ni dawn a, a thawh khatna hi September 18-ah neiin, September 25, leh October 1 ah neih a ni dawn bawk a, inthlan result pawh hi October chhunga tih fel hman tum a ni.