Kerala Assembly-ah eptu member-ten buaina an siam
Kerala finance minister-in Assembly House-a state budget a pharh tur chu eptu member ṭangrualte'n duhloin House chhunga member-te nasa takin an tibuai a, Assembly guard leh treasury bench-a ṭhu te'n an ṭhelh a ngai hial a ni.
Nimin zinga Finance Minister KM Mani-a'n state budget a pharh tur hi duh loin Assembly pawn lamah nawrh huaihawt a ni bawk. House chhunga budget a pharh tur chu eptu MLA-te'n dan tumin buaina an siam a, computer-te an tihchhit bakah chair-te pawh an vawm bawk. Member eng emaw zat chu chair chungah dingin bengchheng an siam a, minister tihbuai tumin tui bottle-te an lo vawm bawk. Eptu MLA-te'n Finance Minister hi an khawih fuh lohna turin guard-te'n an lo dang.
Eptute'n buaina an siamna karah Finance Minister Mani hian state budget chu a chhiar chhuak lui tho a, a chhiar lai hian rorellai United Democratic Front MLA-te chuan minister hi an din hual tlat a ni. Budget a chhiar chhuah hnuah rorellai MLA-te hian an lawmpui thu hrilhin, House aṭanga a chhuak pawh an veng zui a ni. Minister a chhuah hnuah pawh eptu member-te hi house chhungah lungawi loin an la aubuai zui a ni.
Congress kaihhruai UDF sorkar-a finance minister hi zu zawrh phalna renew chungchangah zu dawr neitute hnen aṭanga thamna sum laah puh a ni a, Vigilance and Anti-Corruption Bureau chuan a lakah thubuai a ziaklut a ni. Hei vang hian activist leh eptu pawlte chuan thamna latua puin budget a pharh tur hi dodal an tum thu an lo sawi tawh a ni. Nimina budget a pharh dawn hian house pawn lamah eptu pawl, CPI(M) kaihhruai LDF leh Yuva Morcha activist-te chuan lungawi lohna an lantir bawk.
Ningani zan aṭang khan LDF MLA-te chu House chhunga Mani a lut tur dan tumin Assembly complex-ah hian an lo duty tawh a ni. Mahse Mani leh cabinet minister dangte chuan budget pharh thei loa eptute'n an dan an hlauh avangin hemi zan hian Assembly complex an chhuahsan lo a, nimin zing khan budget hi an pharh lui ta a ni.