Pakistan Court-in Mumbai beihnaa Mawhphurtu chhuah turin ti

Pakistan-a Islamabad High Court chuan kum 2008 November 26-a Pakistan firfiakte'n Mumbai khawpui an beihnaa mawhphurtu Lashker-e-Taiba (LeT) hotu, Zakir-ur-Rehman Lakhvi chu jail aṭanga chhuah zalenna tur thupek a tichhuak.

Court chuan Lakhvi tantir a nih dan chu dan kalh a ni tiin, chhuah zalen turin a ti. Hetihlai hian India chuan chhuah zalen a nih lohna turin a theih angin hma a la dawn tih a sawi ve nghal. Mumbai khawpui beihnaah hian mi 166 an thi a, midang tam takin hliam an tuar bawk.

Minister of State for Home Affairs Kiren Rijiju chuan Pakistan-in firfiak zingah a ṭha leh ṭha lo a awm lo tih a hriat a ngai a ni tiin, "Pakistan agency-te chuan court-ah hian Mumbai beihnaa Lakhvi inhnamhnawih dan finfiahna ṭha an pe lo a ni," a ti.

Lakhvi hi kum 2009 aṭang khan jail-ah tantir a ni a, nikum December thla khan anti-terror court chuan bail-a chhuah a dilna a phalsak a, mahse mi rukbo thubuaiah Pakistan sorkar tantir chhunzawm tura nawr a nih hnuin January thla khan Pakistan Supreme Court chuan jail-a dah chhunzawm turin a rel leh a ni.