Bihar CM-in darkar 24 chhung chawngheia nawrh huaihawt
Bihar Chief Minister Nitish Kumar chuan central-a BJP kaihhruai NDA sorkarin Land Acquisition, Rehabilitation and Resettlement (Amendment) Bill 2015 a siam chu duhloin, kar kalta Inrinni khan Patna-ah darkar 24 awh chawngheia nawrh a huaihawt.
Nitish hian nimin zing dar 10 thlengin chaw a nghei a, a rual hian a cabinet member-te pawhin chaw an nghei bawk.
CM-in Land bill siam danglamna duh loha nawrh a huaihawt lai hian an party JD(U) MP leh MLA bakah office bearer-te chu an awmna hmun ṭheuha chaw nghei ve tura hriattir an ni.
Bihar CM chuan BJP kaihhruai sorkar laipuiin Parliament-a ram lakna dan thar, Land Acquisition amendment Bill a pharh chu loneitute ngaihthahna leh mi hausa-te duhsakna lantirna a ni, a ti. An party chuan he bill siam danglam hi sut a nih hma chuan an dodal chhunzawm zel dawn tih a sawi a, Bihar-ah chuan eng kawng mahin bill siam danglam hi hman a ni ngai lo ang, a ti bawk.
Social activist, Anna Hazare pawhin land amendment bill hi dodalin nawrh a lo huaihawt tawh a, eptu pawl hrang hrang MP-te chuan naktuk hian an duh lohna lantirin Rashtrapati Bhavan pana kawngzawh an tum bawk. He bill siam danglam hi NDA hnuaia BJP thawhpui party ṭhenkhat pawhin an sawisel a ni.
Land Acquisition, Rehabilitation and Resettlement (Amendment) Bill 2015 hi voice vote hmangin Lok Sabha-ah pass a ni tawh a, Rajya Sabha-ah ngaihtuah a ni ve leh ang. Mahse Rajya Sabha-ah BJP hi minorty party a nih avangin bill tlang tir tur chuan party dang member-te a hmin a ngai dawn a ni.