Assembly-a buaina chungchangah Kerala Governor-in report thehluh dawn

Kerala-a eptu pawl MLA-te'n Finance Minister KM Mani-a'n kar kalta Zirtawpnia state budget a pharh tur duh loa house chhunga buaina an siam chungchangah state Governor, P Sathasivam chuan President hnenah report a thehlut dawn tih a sawi.

Thuchhuah a siamah, Governor chuan Assembly-a thil thleng chuan a rilru a ti na hle tih a sawi a, democracy ramah hetiang thil a thleng hi thil vanduaithlak tak a ni, a ti.

Finance Minister KM Mani hi zu zawrh­na phalna pek chhuah chungchangah bar neitute hnen aṭanga thamna pawisa laa puh a ni a, hei vang hian eptu member-te chuan an puhna laka a fihlim tih finfiah a nih hma chu budget pharh tur­in an duh lo tih an sawi.

Minister-in state bud­get a pharh tur hi lo dan tumin eptu member-te chuan house chhungah buaina an siam a, microphone leh computer-te an tihchhiat bakah, chair-te pawh an vawm bawk a, speaker chu ṭawngkam mawi lo taka an ankhum bawk a, guard-te an inrawlh a ngai hial a ni. Rorellai MLA-te an dinhual chungin minister hian budget hi a pharh lui tho a, a pharh zawh hnuah house aṭangin a chhuak nghal a ni.

March 10 khan eptu hruaitu leh MLA dangte chuan Finance Minister hi budget pharh tir lo turin an ngen a, mahse March 11 khan Chief Minister Oommen Chandy chuan an ngenna hi a hnawlsak a ni, a ti.