Ram pathuma tlawh zin PM Modi a rawn haw

Prime Minister Narendra Modi chuan ni nga thanga ram pathum a tlawh hnuah Inrinni zan khan Delhi a rawn thleng leh ta.

PM Modi hian Seychelles, Mauritius leh Sri Lanka-te a tlawh a, a ram tlawhte hi thawhdunna tura inremna thuthlung eng emaw zat a ziahpui nghal.

Inrinni khan PM hian Sri Lanka-a Tamil ho chenna, Jaffna khua a tlawh a, India Prime Minister zingah Jaffna tlawh hmasa ber a ni. Jaffna-ah hian India puihnaa Tamil mite chenna tur in sak 27,000 chu a hlan nghal a ni. Hei hi Sri Lanka tualchhung indona thlen vanga Tamil mi, chenna in chantate puala sak a ni. Modi hian Jaffna leh Colombo inkalpawhna, North-South rail link siamṭhat a nih hnua Thalaimannar aṭanga rel tlanchhuak hmasa ber tur a vailiam bawk.

Modi hian Sri Lanka Parliament-a thu a sawi bakah, an ram hruaitu pawimawhte a kawm bawk.

PM hian nimin khan New Delhi-a Indopui I-naa India sipaite chawimawina hun hman chu a hmanpui ve nghal. A zinchhuah hmain Modi hian Amar Jawan Jyoti, India Gate-ah hian sipaite hriatrengna pangpar a lo dah tawh bawk .

Indopui I-naah khan India sipai maktaduai 1.5 vel an tel a, an zing­a 74,000 chuan nunna an chan a ni. Heng sipaite hriatrengna leh chawimawina hun hi Indian Army chuan a buatsaih a ni.