Facebook-in India ram state 7-ah Hmeichhe tan digital literacy training kalpui dawn

Social media giant Facebook chuan Thawh­lehni khan 'We Think Digital' program chu a hawng a, he program hnuaiah hian India rama state 7-ah hmeichhe nuai khat tan digital literacy training a kalpui dawn.

He program-ah hian Facebook chuan National Commission for Women (NCW) leh Cyber Peace Foundation chu a thawhpui bawk a, ramchhunga hmeichhia ten digital lama hma an sawn theih nan state 7-ah digital literacy training hi neih pui phawt tur a nih thu Facebook lam chuan thuchhuah an siam.

'We Think Digital' program hnuaiah hian ramchhunga mipui mimirten digital lama hma an sawn theih nan leh, social media kal­tlanga thu dik tawk lo vawrh darh ṭhin a nih chungchanga invenna turte zir ho a ni dawn a, mithiamten zirtirna an pe bawk ang.  

Uttar Pradesh, Assam, West Bengal, Madhya Pradesh, Gujarat, Jhar­khand leh Bihar-ahte he program hi kalpui tur a ni dawn a ni.