Rahul Gandhi chhui rua puhna sorkarin a pha
Congress party leh eptu party dangte chuan BJP kaihhruai sorkar laipui chu Congress Vice President Rahul Gandhi chhui ruah an puh a, mahse an puhna hi sorkar chuan a pha.
Nimina Parliament inkhawmah question hour-ah hemi chungchang hi Congress hruaitu Ghulam Nabi Azad chuan a sawichhuak a, tun hnaia sorkar laipuiin Rahul Gandhi-a ina police tir a, zawhna chipchiar tak zawt a, a mit leh sam rawng thlenga an chhinchhiah tir chungchang chu democracy leh mimal zalenna kalh a ni, a ti.
Sorkar laipui tirh police-te hi March 12 khan Rahul Gandhi-a chenna inah kalin thu an zawtfiah a, a pheikhawk bun tawk, a thiltih ṭhin, a mit leh sam rawng, a ṭhian leh lainate bakah an phone number-te thlengin an zawt a ni. Azad chuan hetiang police-te thiltih dan hi tun hma lamin a thleng ngai lo a, a hriatthiam theih loh thu a sawi.
Azad chuan Parliament chhung leh pawn lama sorkar kalphung sawiseltu politician-te, BJP kaihhruai NDA sorkarin vau zam a tumna hmanrua em ni tiin a zawt a, "India hi police ram a ni lo. Pakistan ram anga thuneitute'n an duh duh dana an chawhkual theih a ni lo," a ti.
Congress hruaitu dang, Anand Sharma pawhin sorkar lapuiin political leader-te phone-a inbiakna an chhinchhiah ru nia sawi pawh chhui chian a phut thu a sawi bawk.
Eptute puhna hi chhangin, Finance Minister Arun Jaitley chuan chhangin Congress party chuan an la vung mai niin a sawi a, Rahul Gandhi chu chhui ruk a ni lo a, thu zawhfiah pawh a ruk taka tih a ni, a ti. Jaitley chuan, a hma pawhin security thil atan VIP-te chanchin chu chhinchhiah a lo ni tawh ṭhin tih a sawi.
Hetihlai hian Congress Party president atana Rahul Gandhi hlankai hun tur chu tihfel a la ni lo. All India Congress Committee hunah Rahul Gandhi hi party president-ah hlankai a ni dawn a, mahse meeting neih hun tur hi April thla chhunga neih tura tih ni mah se a hun tak tihchian a la ni lo. Meeting-ah hian Rahul-a farnu, Priyanka Gandhi pawh party worker-te phut angin chanvo pawimawh pek a ni tawh dawn nia sawi a ni bawk.