Puducherry assembly-in CAA, NRC leh NPR Duh lohna resolution pass

Puducherry Legislative Assembly chuan nimin khan Citizenship Amendment Act (CAA), National Register of Citizens (NRC) leh National Population Register (NPR) duh lohna resolution a pass ve leh.

 

Chief minister V Narayana­samy chuan Assembly-ah resolution hi a pu lut a, Congress leh DMK member-te chuan CAA, NRC leh NPR in India rama sakhua leh hnam hrang hrangte zalenna a tihderthawn theih dante an sawizui a ni. 

Eptu party, All India NR Congress leh AIADMK chuan assembly special session hi an boycott thung a, BJP member pathumte pawh CAA, NRC leh NPR duh lohna resolution pass vang hian house aṭangin an chhuak tau bawk. 

Member 30 awmna assembly-ah hian  Congress-in member 14 neiin, member pathum nei DMK leh independent MLA pakhat nen ṭangrual sorkar an siam a ni. All India NR Congress hian member pasarih neiin, AIADMK in pali leh BJP in nominated member pathum a nei a ni.