PM-in pawngsual leh biak in suasam a dem VHP hotuin Kristian-te beih chhunzawmah a vau

Prime Minister Narendra Modi chuan West Bengal-a senior 'nun' pawngsual rawn a ni leh, Haryana-a Kristian biak-in suasam a ni chu a dem thu nimin khan a sawi a, heng thil pahnih chung­changah hian report theh­luh thuai turin a ti.

Kar kalta Inrinni khan West Bengal-a Nadi district-ah mi pariatin convent-a Ranaghat sub-division-a Jesus and Mary convent school-a Sister Superior, kum 72 an pawngsual rawn a, Pathianni khan Haryana-a Hisar district-ah biak-in saklai chu tih­chhiatsak an ni bawk.

Hetihlai hian Vishwa Hindu Parishad (VHP) joint general secretary Surendra Jain chuan sakhaw inlehtir ṭhin chu tihtawp a nih loh chuan Haryana-a Kristian biak-in beih ang hi a thleng nawn zel ang, a ti.

Jain chuan Hisar district-a biak-in sakna khuah hian Kristian an awm lo a, an tum ber chu tualchhung mite Kristian sakhuaa inlehtir a ni tiin, "Eng vangin nge Kristian awm lohna khuaah biak-in an sak? Vatican-ah khuan Hanuman temple sak min phalsak ve dawn em ni? An phal a nih chuan India ram khawi hmun­ah pawh biak-in an sak kan phalsak mai bakah, a sakna tur sum pawh kan tumsak ang," a ti.

West Bengal-a 'nun' pawngsual rawn chung­chang pawh sawiin, VHP hotu chuan nun-te tih­chhiat chu Kristian-te tihphung a ni a, kohhran inphiarna a ni, a ti. "Vatican pawhin mipat hmeichhiat lam hawi complain chu kum nga chhung 5,000 a dawng a, hei vang hian Pope pawhin anpui kawp chu dan anga phalsak mai turin a dil phah a ni," a ti. 'Nun' pawngsual rawn leh Hisar-a biak-in suasamnaah hian VHP a inrawlh lo tih a sawi bawk.

VHP hotu thusawi chungchang hi nimin khan Congress party chuan Lok Sabha rorel inkhawmah an sawi­chhuak a, eptute chuan Sangh Parivar laka an lungawi lohna thu sawiin Question Hour-ah sawi ho an rawt. Mahse eptute rawtna hi Speaker Sumitra Mahajan chuan a hnawlsak.