Congress-in land bill duh lohna lantir chhunzawm

Congress Party chuan Thawhṭanni khan BJP kaihhruai NDA sorkarin land acquisition bill a siam danglam chu duh loin lung­awi lohna an lantir.

Party worker-te chuan New Delhi-ah Parliament panin kawng an zawh a, an zinga ṭhenkhatin police-te kawng dalna siam an tihchhiat avangin mi 500 chuang man an ni.

Land acquisition amendment bill hi Lok Sabha-ah pass a ni tawh a, Rajya Sabha-ah ngaihtuah a ni leh ang.

Kawngzawh hi senior party leader- Anand Sharma, Ghulam Nabi Azad, Ambika Soni, Ahmed Patel leh Oscar Fernandes-te'n an ho a ni. Police-te'n kawngzawh an man zing­ah hian Youth Congress President Amarinder Singh bakah hmeichhia eng emaw zat an tel.

Ambika Soni chuan kawngzawhte laka police-te chetdan chu a dem thu sawiin, an kut thlak avangin mi 5-6 velin hliam an tuar tih a sawi.

Ahmed Patel chuan NDA sorkarin land bill a siam chu loneitute ngaithah a, mi hausa zawkte ṭhatna tura duan a ni tiin, an party chuan an dodal zel tur thu a sawi. Party President Sonia Gandhi hoin hruai­tu ṭhenkhatte'n President Pranab Mukherjee chu land bill chungchang hi sawipui an tum bawk.