IAS thih danin ngaihven a hlawh

IAS officer DK Ravi chu Thawhṭanni khan Bengaluru, Karnataka-a a chenna inah thia hmuh a ni a, a thih dan chhui chian phutin nimin khan Bengaluru leh Kolar-ah kawng an zawh.

2009 batch IAS officer, kum 35-a upa Ravi hi mi dik leh chak tia hriat a ni a, tun hnaiah Commercial Taxes joint commissioner hna a zawm thar a ni. A hna a zawm hnu hian khawpui chhunga in sa tu, kum eng emaw zat chhiah lo awlrute dapchhuah hna a thawk a, an chhiah pek tur a lakkhawm aṭang hian chneg vaibelchhe 100 chuang a hmu hman a ni.

Nimina kawngzawh zinga a tam zawk hi Aam Aadmi Party(AAP) leh Kannada group, Jai Karnataka member-te an ni a, Ravi thihdan chu Central Bureau of Investigation (CBI) chhuitir an phut.

Karnataka-a eptu pawl, BJP pawhin Ravi thih dan chungchangah state sorkar chu thu dik tak sawi tura an phut thu an tarlang bawk. BJP chuan, "IAS officer la naupang tak, khawpui chhunga in satu dik lo taka thiltite dapchhuah hna thawktu thih dan hian mi a ṭhawng hle. Tun thlengin a thih dan chungchangah hian thu chiang engmah hriat a la ni lo," a ti.

Hetihlai hian police-te chuan Ravi thihdan an chhuinaah mahni intihlum nia a lan thu an tarlang. Police Commissioner MN Reddi chuan Ravi hi a chenna-inah ceiling fan-a inkhaihluma hmuh a nih thu a sawi. A mobile record te, a apartment reception-a entry record leh CCTV camera-te an la enchiang leh dawn tih a sawi bawk.