PDP-in J&K poll manifesto tlangzarh: Congress leh NC tan seat ken vek an inhuam

Jammu and Kashmir assembly inthlan neih tur atan, chief minister hlui Mehbooba Mufti party, People's Democratic Party (PDP) chuan Inrinni, August 24 khan manifesto an tlangzarh.

Party president, Mehbooba chuan manifesto hi tlangzarhin, inthlan lo awm tur chu an tan seat insem leh state nihna neih let leh ringawt chungchang ni loin, J&K zahawmna humhimna turin an bei dawn tih a sawi. Hemi rual hian J&K buaina chinfel a nih theihna atan an duhdante chu an zawmpui thei a nih chuan, National Conference leh Congress party tan seat ken vek an inhuam thu a sawi bawk.

"Thawh hona leh seat insem hi thil dang daih a ni. National Congress leh Congress chuan kan agenda min pawmpui chuan seat zawng zawngah an chuh vek kan remti a, kan thlawp dawn a ni," tiin CM hlui chuan a sawi. Manifesto-ah hian Pakistan nena inrina, LoC-ah sumdawnna kalpui chhunzawm an phutna pawh a tel a, union home minister Amit Shah chu Pakistan nena insumdawn tawnna chu hawng leh turin an ngen. Hei bakah J&K-a sakhaw hmun pawimawh - temple, mosque leh shrine-ah a thlawna electricity pek vek an tiam bawk.

NC leh Congress-in seat insem dan tifel hnai

Jammu and Kashmir assembly inthlan lo awm tura Congress party leh Natonal Conference chuan thawh dun an lo remti tawh a, seat insem dan tur pawh an buaipui mek.

NC vice president Omar Abdullah chuan party pahnihte chu Assembly seat awm zat, seat 90 aṭangin a tam zawka seat insem dan tur hi an rel fel tawh a, seat tlemte erawh tih fel theih loh a la awm a ni, a ti.

BJP chuan inthlan hi party mala chuh a tum thung a, BJP leader leh J&K Waqf Board chairperson, Darakhshan Andrabi chuan party candidate te pawh an puang thuai dawn niin a sawi.

J&K assembly inthlan hi thawh thuma neih a ni dawn a, September 18, September 25 leh October 1-ah vote thlak a ni ang.