CBI-in RG Kar Medical College Principal hlui chenna in dap

Kolkata-a doctor zirlai pawngsual leh thah a nih chungchang chhuitu, Central Bureau of Investigation (CBI) chuan Pathianni, August 25 khan pawikhawihna thlenna hmun, RG Kar Medical College Principal hlui Sandip Ghosh-a chenna in an dap.

Medical college-a sum hman dan felhlel awm kaihhnawihah CBI hian Ghosh-a chenna in bakah, Medical Superintendent cum Vice Principal hlui Sanjay Vashisth leh mi dang 13-te in an dap bawk a ni.

CBI hnuaia Anti-Coruption unit chuan damlo enkawlte tana hman tur bungrua leh mamawh hrang hrang supply tute in leh office-te pawh an dap tel bawk.

Central agency-a thawktu pasarihte chuan Ghosh chu a chenna in Beliaghata-ah zing dar 8:00 aṭang khan thu an zawtfiah a, mi dangin ex-MSVP Vashisth leh Forensic department-a thawk professor chu thu an zawt bawk niin an sawi.

CBI lam hi central forces ten puibawmin, Ghosh-a chenna in zinglam dar 6:00 ah an thleng a, mahse inchhunga luh phalsak an nih hma hian darkar khat leh a chanve dawn an nghak niin official-te chuan an tarlang. CBI team dang hian Ghosh-a office, hospital lama mi leh canteen academic building-a mi te pawh an dap bawk a ni. Calcutta High Court-in a hriattir angin, CBI hian tualthah thubuai leh sum hman dik loh chungchangah thubuai an ziak lut tawh a ni.