Sorkar laipuiin Unified Pension Scheme a pawm

Union Cabinet chuan Inrinni, August 24 khan National Pension System (NPS) hnuaia sorkar hnaa lut, hnathawktu nuai 23 ten an hlawh 'base salary' aṭanga 50% pension atana an lakna tur, Unified Pension Scheme a pawm.

Cabinet thutlukna hi informatoin and broadcasting minister Ashwini Vaishnaw chuan puangin, full pension emaw, 50% emaw la tur chuan hnathawktu hian service kum 25 a neih tlin a ngai tih a sawi. Hetiang zat service nei chuan an pension hma thla 12-ah average basic pay aṭanga 50% hi an la thei ang. Kum 25 service nei pha lo te tan, a tlem berah kum 10 service neih tlin a ngai dawn a ni.

NPS hnuaia in ziak lut zawng zawngte chuan an duh thlannain Unified Pension Scheme hnuaiah hian a in ziak lut ve thei dawn a, he scheme hi nakkum sorkar kumthar aṭanga hman ṭan a ni ang.

Nikum-ah khan finance secretary, TV Somanathan kaihhruaina hnuaiah Finance Ministry chuan committee dinin, National Pension System lo awmsa ruangam leh duansa zulzuiin sorkar hnathawkte tana pension scheme ennawn a, thlak ngaite a awm chuan rawtna siam tura tih an ni.

Sorkar hnathawkte tana New Pension Scheme duan chu BJP ni lo party dang sorkarna state ṭhenkhat chuan sutin, Old Pension Scheme hman leh an tum tih an sawi. State dang ṭhenkhatah pawh sorkar hnathawkte hian Old Pension Scheme hi hman leh an phut mek bawk.