Law Minister-in IAS officer thih dan CBI chhui tir phut

Union Law Minister Sadananda Gowda chuan nimin khan Union Home Minister Rajnath Singh hmuin, Karnatka-a IAS officer DK Ravi thihdan rinhlelhawm tak chu CBI chhuitir a phut.

BJP MP leh Karnataka CM hlui BS Yeddyurappa pawhin a chenna-ina thia hmuh, Ravi-a thih dan hi CBI in chhui ngei se a duh tih a sawi bawk.

2009 batch IAS offi­cer, DK Ravi hi Com­mer­cial Taxes joint com­missioner niin Benga­luru-a a chen­na-inah Thawhṭanni khan thia hmuh a ni. Ravi hian Benga­luru khawpuia in sa tu, kum eng emaw zat chhiah lo awlrute dapchhuah hna a thawk a, an chhiah pek tur a lakkhawm aṭang hian cheng vaibelchhe 100 chuang a hmu hman a ni. Hei bakah hian dan loa balu la ṭhinte tihtawp tumin beihpui a thlak bawk. A hnathawh ṭhat avang hian mipuite hriat a hlawh rualin dan kalha sumdawngte hnawk tih pawh a hlawh phah hle a ni.

Karnataka Chief Minister Siddaramiah chuan Ravi-a chenna-in hi tlawhin, a thihdan chu chhui mek a nih thu a sawi. Bengaluru police-te chuan Ravi-a thih dan chhui tur bik, special team a din tawh bawk.

Police-te chuan an chhuina report hmasa an tihchhuahah Ravi hi mahni intihlum niin an sawi a, mahse hei hi mipui nawlpuite chuan pawm loin lungawi lohna an lantir nghal a, CBI chhuitir an phut.

Ravi-a pa pawhin a fapa thih danah hian thil dik tawk lo a awm nia a hriat thu a sawi a, dik lo taka in satute a dapchhuahna kawngah in satu lam aṭang pawh hian nawrna a tawk nasa hle a ni, a ti. Police report-a mahni intihlum anga a fapa an sawi chu an chhungkua chuan an pawm thei lo tih a sawi bawk.

Karnataka-a eptu party, BJP chuan Ravi thih dan chu CBI chhuitir ngei an phut tih an sawi bawk a, BS Yeddyurappa chuan, "DK Ravi hi officer rinawm tak a ni. Polilitcs thil vanga thah ni ngeiin kan ngai a, hei vang hian eptu party hrang hrang MLA-te chuan a thihdan dik tak chhui chhuah a nih theih nan CBI in chhui ngei se kan duh," a ti. Thawhlehni zan khan eptu party MLA-te chu Karnataka assembly-ah lungawi lohna lantirin an ṭhu tlaivar a ni.