Black money bill-ah kum 10 lung in tantir rawt

Union cabinet chuan chhiah awlruk duh vanga ram pawn lama sum chheprelhte chungchang ngaihtuahna tur bill chu Thawhlehni khan a pawm.

Undisclosed Foreign Income and Assets (Imposition of Tax) Bill-ah hian chhiah awlruk tum vanga sum chheprelhte chu chhiah awlruk an tum let 300 thleng chawitir leh, hrehawm taka kum 10 chhung lungin tantir tura rawtna telh a ni.

Finance Minister Arun Jaitley chuan bill hi Parliament session neih mekah hian pharh tum a nih thu a sawi. Minister chuan Benami Transactions (Prohibition) Bill thar leh rintlak zawk pawh pharh a ni dawn tih a sawi a, Income Tax Act siamṭhat a rawt bawk.

Budget session neih mek hi thawh hniha neih a ni dawn a, a thawh khatna chu Zirtawpni hian a tawp ang. Mahse sorkar laipui chuan coal leh mines bill ngaihtuah a, sawi ho a nih theihna atan session thawh khatna hi ni hnih pawhsei a tum. Heng bill pahnihte hi Lok Sabha-ah pass a ni tawh a, Rajya Sabha-a select committee hnenah thawn a ni tawh. Mahse Rajya Sabha-ah hian BJP kaihhruai NDA sorkar hi minority a ni a, awlsam taka a tlang mai a rinawm lo. Rajya Sabha-ah hian amemdment bill hi a tlang thei a nih chuan Lok Sabha pawmpuina la turin thawn let leh a ni ang.